Deputetja e NISMA-s, Xhevahire Izmaku, ka theksuar se një marrëveshje politike është e mundshme brenda afatit kushtetues, nëse ekziston vullnet i sinqertë për të vendosur interesin e shtetit mbi ato partiake.
Ajo përshkroi situatën aktuale si një sfidë për institucione funksionale dhe theksoi se çdo vonesë në konstituimin e Kuvendit do të ishte e pajustifikueshme dhe do të dëmtonte besimin e qytetarëve.
“Besoj që marrëveshja politike është e mundshme brenda afatit kushtetues – nëse ekziston vullnet i sinqertë për ta vendosur interesin e shtetit mbi interesat partiake.Kosova ka nevojë për institucione funksionale dhe Kuvendi është themeli i funksionimit demokratik. Prandaj, çdo vonesë do të ishte e pajustifikueshme dhe dëmton besimin qytetar”, tha Izmaku.
Izmaku shtoi se, nëse marrëveshja politike nuk arrin të arrihet brenda afatit kushtetues, problemi nuk është te Kushtetuta, por te mungesa e vullnetit politik.
Ajo apeloi për respektimin e vullnetit të qytetarëve, të shprehur përmes votës, dhe për veprim të menjëhershëm për të siguruar funksionimin e institucioneve.
“Nëse mungon marrëveshja politike brenda afatit kushtetues, atëherë problemi nuk është tek Kushtetuta, por tek mungesa e vullnetit politik. Qytetarët kanë folur përmes votës, dhe është detyrë e partive ta zbatojnë këtë vullnet në institucione funksionale. Nuk ka më kohë për kalkulime politike”, tha Izmaku për GazetaBlic.
The post Flasin nga NISMA: S’ka më kohë për kalkulime, marrëveshja politike duhet të bëhet brenda afatit kushtetues appeared first on GazetaBlic.
About The Author
