Eksperti britanik, Eric Gordy, ka komentuar situatën e bllokuar në Kuvendin e Kosovës, raporton GazetaBlic.
Ai për GazetaBlic ka theksuar se është e zakonshme që parlamentet të bllokohen, por nuk mund të vazhdojë kështu pafundësisht.
“Nuk është e pazakontë që parlamentet të bllokohen, dhe në disa shtete (Belgjikë, për shembull) kjo ndodh shumë shpesh. Përgjithësisht, në këto raste, presidenti bën një vlerësim që asnjë parti nuk është në gjendje të formojë një qeveri dhe thërret zgjedhje të reja, me shpresën se një parlament i ri do të jetë më pak i ndarë”, tha Gordy.
Sipas tij, edhe pse një mandat teknik mund të vazhdojë për një kohë, Kurti do të ketë nevojë për një shumicë parlamentare për të miratuar ligje.
Ai theksoi se për të kaluar këtë situatë, Kosova duhet të sigurojë një kalim të qetë të pushtetit përmes zgjedhjeve, që është një shenjë e forcës së demokracisë.
“Por, duke e thënë kështu, duket sikur procesi është krejtësisht teknik. Natyrisht, nuk është kështu. Ka konsiderata politike që ndikojnë në këtë vendim. Në këtë moment, është ndoshta e vërtetë që si presidenti ashtu edhe kryeministri ndihen të pambrojtur politikisht, që ata presin që votuesit do t’i ndëshkojnë për krizën parlamentare dhe se partia e tyre do të humbasë. Po ashtu, duket se z. Kurti do të ishte i kënaqur të mbetej në qeveri me një mandat teknik për një periudhë të gjatë”, tha Gordy.
“Natyrisht, kjo situatë nuk mund të zgjasë pafundësisht. Edhe një mandat teknik i gjatë nuk i lejon zotit Kurti të bëjë të gjitha gjërat që ai beson se duhet t’i bëjë, pasi në fund ai do të kërkojë një shumicë parlamentare për të miratuar ligje. Dhe mungesa e pavarësisë nga ana e presidentes po minon legjitimitetin e pozicionit të saj”, shtoi ai.
Gordy përfundoi duke thënë se, ndonëse mund të jetë e vështirë për Kurtin, kalimi në opozitë është një proces normal në çdo demokraci.
“Një nga masat e forcës së një demokracie është nëse ajo është në gjendje të realizojë një kalim paqësor të pushtetit nga një parti në tjetrën përmes zgjedhjeve. Kjo është një arsye pse zgjedhja e parë e Albin Kurtit duhet të konsiderohet një arritje për Kosovën, pavarësisht nëse dikush e mbështet atë dhe partinë e tij apo jo. Do të ishte dëmtuar rekordi demokratik relativisht i mirë që Kosova ka arritur deri tani, nëse do të sakrifikohej kjo arritje. Çmimi për zotin Kurti ka të ngjarë të jetë që partia e tij do të kalojë një periudhë në opozitë, por kjo nuk është një katastrofë. Në shtetet demokratike, çdo parti kalon një periudhë në opozitë”, tha Gordy për GazetaBlic.
The post Gordy për bllokadën në Kuvend: Kurti mund të kalojë në opozitë, në shtetet demokratike ndodhë diçka e tillë appeared first on GazetaBlic.
About The Author
