Më shumë se 15 muaj nga vendimi për themelimin e Korporatës për Ruajtjen e Energjisë, Qeveria është ende në proces të rekrutimit të anëtarëve të Bordit të Drejtorëve.
Edhe pse vitin e kaluar Ministria e Ekonomisë kishte njoftuar se pret që Bordi i Drejtorëve të emërohet në Dhjetor të 2024-tës, në fund të atij muaji u arrit vetëm shpallja për katër anëtarë në këtë organ drejtues.
Përkundër vonesave, pa dhënë detaje Ministria e Ekonomisë i tha TV Dukagjinit se po vazhdon puna për funksionalizimin e ndërmarrjes së re.
“Lidhur me pyetjet që keni parashtruar ju njoftojmë se Korporata për Ruajtjen e Energjisë (KRE) tashmë është e themeluar nga Qeveria e Republikës së Kosovës dhe është në proces të rekrutimit të plotë të Bordit të Drejtorëve”, deklaruan nga Ministria e Ekonomisë.
Qeveria synon funksionalizmin e ndërmarrjes që u themelua më 13 mars 2024, si derivat i marrëveshjes me Korporatën e Sfidës së Mijëvjeçarit – MCC për grantin 202 milionë dollarë, pavarësisht raportimeve në SHBA që administrata Trump synon shkurtime buxhetore e deri në mbyllje të kësaj agjencie amerikane.
“Qeveria e Republikës së Kosovës si palë nënshkruese e Marrëveshjes “Kompakt” nuk ka pranuar asnjë njoftim zyrtar”, përfundon Ministria e Ekonomisë.
Ish-kryeministri Avdullah Hoti, në fund të muajit prill, teksa kishte shkruar se “MCC po mbyllet”, kishte thënë se Kosova do të humbë grantin, duke përmendur refuzimin e projektit të gazit.
Sidoqoftë, MCC-ja nuk ka treguar nëse ka ndonjë vendim lidhur me projektin për blerjen e baterive për ruajtjen e energjisë elektrike.
Në kuadër të projektit pesë vjeçar me MCC-në, Kosova synon të blejë dhe instalojë bateri me kapacitet deri në 340 megavatë orë.
The post Me vonesa, Qeveria vazhdon për korporatën për ruajtjen e energjisë: S’ka njoftim nga MCC appeared first on GazetaBlic.
About The Author
